BMTda “UN Public Service Forum –2025”ga tayyorgarlik ishlari muhokama qilindi
2025-04-16 08:30:00 / Vazirlik yangiliklari
O‘zbekiston delegatsiyasi tarkibida Raqamli texnologiyalar vazirligi rahbariyati Amerika Qo‘shma Shtatlariga xizmat safarini amalga oshirmoqda.
Safar doirasida Nyu-York shahridagi BMT Bosh qarorgohida yig‘ilish tashkil etildi. Unda 2025-yil 23–25-iyun kunlari Samarqand shahrida o‘tkazilishi rejalashtirilayotgan BMT Davlat xizmatlari forumi (UN Public Service Forum –2025)ga tayyorgarlik ishlari va O‘zbekistonda IT sohasida amalga oshirilayotgan islohotlar yuzasidan taqdimot bo‘lib o‘tdi.
Yig‘ilishda mazkur forum BMT tuzilmalari, xalqaro tashkilotlar va turli mamlakatlar vazirlari ishtirok etadigan yuqori darajadagi plenar sessiyalar, amaliy seminarlar hamda O‘zbekiston tajribasini namoyon etuvchi milliy keyslar taqdimoti bilan boyitilgan yirik xalqaro va nufuzli tadbirga aylanishi qayd etildi.
Shuningdek, tadbirda boshqa davlatlarning yuqori martabali vakillarining forumda ishtirok etishi, xususan, Nyu-Yorkdagi BMTning doimiy vakilliklari bilan yo‘lga qo‘yilgan hamkorlik masalalari muhokama qilindi.
Forumning nafaqat davlat tashkilotlari, balki ilmiy-akademik doiralar, xalqaro va mintaqaviy tashkilotlar, IT-kompaniyalar hamda fuqarolik jamiyati vakillarini ham qamrab olishi muhim ekani alohida ta’kidlandi.
Tadbir yakunida BMT Bosh kotibining yordamchisi Navid Xanif tomonidan O‘zbekistonda amalga oshirilayotgan izchil raqamli islohotlar, elektron hukumatni joriy etish va davlat xizmatlari sifatini oshirish borasidagi chora-tadbirlar yuqori baholandi. Shuningdek, O‘zbekiston Markaziy Osiyodagi ilg‘or islohotlar namunasi sifatida qayd etildi. Forumning Samarqandda o‘tkazilishi mamlakatning xalqaro maydonda tobora ortib borayotgan nufuzining yana bir misoli sifatida e’tirof etildi.
Shu bilan birga, UNDESA (BMT Iqtisodiy va ijtimoiy masalalar bo‘yicha departamenti) O‘zbekistonning global reytinglar va indekslarda faol ishtirok etishi, ochiq, barqaror va samarali davlat institutlarini shakllantirishga qaratilgan tashabbuslarini qo‘llab-quvvatlashga tayyor ekanini bildirdi.